Rydym wedi ymrwymo i roi'r gwasanaeth gorau a allwn i chi. Os oes rhaid i chi gwyno am wasanaeth a ddarparwyd, byddwn yn sicrhau bod eich cwyn yn:
- cael ei thrin o ddifrif
- cael ei thrafod heb ragfarn neu wahaniaethu
Byddwn yn parchu eich cyfrinachedd hefyd.
Os ydych chi'n anfodlon â'r gwasanaeth a gawsoch, dylech chi gysylltu â ni cyn pen tri mis o'r digwyddiad neu'r canlyniad rydych chi'n cwyno amdano gan nodi:
- beth rydych chi'n teimlo sydd wedi mynd o'i le
- beth rydych chi'n meddwl y dylem ni ei wneud i'w unioni
Mae ein trefn gwyno ar gael i:
- gwsmeriaid sydd wedi defnyddio ein gwasanaethau
- pobl sy'n teimlo eu bod nhw heb gael gwasanaeth roeddem ni wedi dweud y byddem ni'n ei ddarparu
Gall eiriolwyr neu gynrychiolwyr gwyno ar ran cwsmeriaid hefyd, ond bydd angen cadarnhad ysgrifenedig arnom sy'n datgan eich bod chi wedi cytuno y gallan nhw weithredu ar eich rhan.
Nid yw'r gwasanaeth hwn yn cynnwys cwynion am elusennau. Os oes gennych chi gŵyn am elusen dylech chi ddarllen ein canllaw Cwyno am elusen.
Beth fyddwn ni'n ei wneud gyda'ch cwyn?
Cam 1 - Datrys yn Lleol:
I gychwyn, byddwn ni'n ceisio datrys eich cwyn yn yr adran o'r Comisiwn roeddech chi'n delio â hi. Yn y lle cyntaf, bydd rhywun sydd heb ddelio â'ch achos gwreiddiol yn ystyried eich pryderon mewn ffordd deg a diduedd. Lle bynnag y bo'n bosibl, byddan nhw ar lefel uwch na'r gweithiwr achos gwreiddiol.
Bydd yr adolygydd yn ystyried eich cwyn ac yn ceisio rhoi ymateb i chi cyn pen 20 diwrnod gwaith, gan esbonio:
- casgliadau ei adolygiad
- y rhesymau dros y canlyniad
Cam 2 - Ail Adolygiad:
Os ydych chi'n anhapus â chanlyniad y cam Datrys yn Lleol, mae gennych chi fis i ofyn i'ch cwyn gael ei adolygu. Bydd rhywun sy'n annibynnol ar y cam Datrys yn Lleol yn ystyried eich cwyn eto er mwyn asesu a oedd ein gwasanaeth yn is na safon dderbyniol. Bydd yn ceisio rhoi'r canlyniad i chi cyn pen 30 diwrnod gwaith.
Atebion
Yn y ddau gam, byddwn bob amser yn asesu achosion yn unigol. Nid oes unrhyw atebion safonol neu awtomatig, yn ariannol neu fel arall.
Wrth benderfynu beth fydd yr atebion, byddwn yn:
- ystyried yr holl wybodaeth berthnasol
- cynnig yr hyn rydym ni'n teimlo sy'n ateb teg a chymesur, gan ystyried unrhyw anghyfiawnder neu galedi a gawsoch
Os ydym yn penderfynu ein bod ni wedi gwneud camgymeriad, neu heb ddelio â chi yn briodol, gwnawn bopeth posibl i unioni pethau.
Gall hyn olygu ein bod ni'n:
- ymddiheuro
- cywiro unrhyw gamgymeriadau er mwyn, lle'n bosibl, eich adfer i'r sefyllfa y byddech wedi bod ynddi pe na fyddwn wedi gwneud camgymeriad
- cymryd camau pellach mewn ymateb i'ch pryderon
- dweud wrthych beth rydym wedi'i ddysgu o'r gŵyn a pha gamau y byddwn yn eu cymryd i sicrhau nad ydym yn gwneud yr un camgymeriad eto
- rhoi taliad cysur os ydych chi wedi cael llawer o galedi neu anghyfiawnder
Y Camau Nesaf
Pan fyddwn yn rhoi gwybod i chi beth yw canlyniad Cam 2, hwn fydd ein hymateb olaf i'ch cwyn.
Yr Adolygydd Cwynion Annibynnol (ACA)
Er hynny, mae'r Comisiwn yn gweithredu cynllun adolygu cwynion annibynnol ar gyfer y cwynion mwyaf cymhleth a difrifol. I gael rhagor o fanylion am y meini prawf mynediad a'r darparwyr ACA gweler ein canllaw ACA.
Yr Ombwdsmon Seneddol a Gwasanaeth Iechyd (OSGI)
Mae OSGI yn ystyried rhai cwynion am y gwasanaeth sy'n cael ei ddarparu gan amryw o gyrff, gan gynnwys y Comisiwn.
Mae rhagor o wybodaeth ar gael gan:
Yr Ombwdsmon Seneddol a Gwasanaeth Iechyd
Millbank Tower
Millbank
Llundain SW1P 4QP
0845 015 4033
E-bost: phso.enquiries@ombudsman.org.uk